L'istwère dèl cinse
(è lîdjwès po Nicole Hanot - è rifondou walon po Lucyin Mahin)
Po l'istwère di Hèrmåle, on pout r'monter lon divins l' tins, mins po cisse dèl cinse, seulemint à 1642.
C’èst ciste annêye-la qu' li conte Conrard d’Ursel, mêsse dèl signeûrèye dè Hèrmåle dispôy li 16 di may 1639, finit d’ constrûre ine toûr cwårêye avou flèche èt årvô come intrêye à s' tchèstê.
À hintche : Ridessinèdje dèl toûr,
d’après Le Patrimoine monumental de la Belgique, Tome 16/1,Mardaga, Lîdje, 1992,
èt li graveûre dè Remacle le Loup, 1735
(å mitan, èt agrandih'mint dèl flèche al dreûte.)
Dè costé dè nôrd, li toûr a dès moyins po s' disfinde :
Foto dèl bèrtèke avou l' dåte 1642
- ine bèrtèke è tawia (1) avou 2 blazons qui d'vît pwèrter lès armes d’Ursel èt de Roblès, dizeû l'årvô (2),
- on pont-lèvis : (3) qui, rilèvé, s' rabat' divins l' batêye (4) – avou deûs colîres (5), dès deûs costés dèl bèrtèke, po lès d'bouts bîh'rèces (mètous do costé dèl bîhe) dès londjes (6).
Al dreûte : li mècanique d’après Viollet-le-Duc.
Cwand li pont-lèvis èst rabahî po poleûr passer po-d'zeûr li fossé plin d’èwe, i ripwèzèt so on li prumîre åtche d'on pont qui mine å vî dè tins des Romins po-z aler dè viyèdje å wé d’Ama (so Moûse).
Ci pont ås åtches èst co so lès plans dè cadasse dè XIXe siéke.
I a stu « ritrové » tot fant dès ovrèdjes è 2006.
Ca i a todi stu là, minme si on nèl vèyeut pus ! Catchî po l' meûr dè costé dè tchestê èt po on tèrin d' distchèrdjèdje dè l’ôte…
Çou qu' vos crèyez èsse djusse ine alêye tchèrdjèye di pîres, po-z aler dèl vôye al mohone, c'èst vrémint li d'zeûr dè pont.
Conrard d’Ursel fa ossi bati ine novèle construkchon è « L », djondant li toûr.
Li cinse as XVIIe siéke, dizos Conrard II d’Ursel
1. Tchèstê – 2. Toûr d'intrêye – 2a. Li pont ås åtches – 3 èt 4. Lès novèlès construkchons – È rodje : sins' po l'intrêye å tchèstê
Divins li novèle construkchon, i gn-a on lodjis' po l' cinsî dè costé nôrd, pwis dès stås po l' atèlêye, po lès vês, po lès pourcès, etc., avou on grand cina.
Li grègne fêt li scwére avou ine grande pwète èt ine tcherpinte è mêrin d' tchinne.
Li tcherpinte
De costé dè sûd, i gn-a deûs toûrs avou treûs ostèdjes èt, inte di zèles, puzieûrès plèces èt deûs stås dès dj'vås avou des vôsseûres, wice qu'on troûve li Mûzêye do Bin-magnî (Mûzêye dèl Goûrmandîhe).
Onk dès stås dès dj'vås
Cwand li p'tit-fi di Conrard II d’Ursel, Philippe-Albert conte di Milan d’Hermalle, vind li signeûrèye à Guillaume de Moreau li 20 di may 1704, li cinse pout cont'ni « trois cents moutons et quantité d’autres bestiaux ».
Li famile de Moreau wåde li signeûrèye deûs djènèråcions å long.
È 1735, li graveûre dè Remacle le Loup mostere todi ine flèche pol toûr d'intrêye mins ça va candjî èt on n' sait å djusse cwand : li pont-lèvis, qui n' chev pus à rin, èst prindou foû, lès colîres ossi èt on trawe ine bawète dès deûs costés dèl bèrtèke.
I s' pout qu' ci seûye dizos lès Moreau ou dizos lès Louvrex qui sont div'nous prôpriyètêres po l' marièdje di Marie Catherine de Moreau à Charles Louis Joseph Augustin de Louvrex.
Co tins do XVIIIe siéke, on radjoute co ine construkchon (5), èt on a anfin ine basse-coû pavêye avou ine plèce po l'ansinî ; ça done ossi pus d' plèce po lès stås, èt l' cinse si loume « Mohone dèl Boverèye ».
Li cinse « Mohone dèl Boverèye » å XVIIIe siéke
È vért : on pré.
Dispôy 1795, Hèrmåle deût payî lès contribucions foncîres al France ca li Principåté d' Lîdje a disparètou èt l' payis a div'nou li « département de l’Ourthe ». Gn-a pôr ine take so les pwètes èt lès fignèsses ! Adon on ristope lès deûs f'gnèsses qui sont dè costé dèl bèrtèke.
Lès fignèsses murées disqui 1911.
Li cinse èst fwêtemint candjî å XIXe siècle dizos deûs novês prôpriyètêres :
È 1807, li vève dè baron de Hermalle Mathias Guillaume II de Louvrex si marie avou Charles-Nicolas-Joseph Warzée èt li signeûrèye candge co dè nom.
È 1837, on mèt' ine pwète à l’intrêye dèl toûr.
Li pwète rinov'lée è 1994
Charles Warzée èst div'ni li baron de Warzée d’Hermalle èt s' feûme lui done on fi qui rind l'åme à l’âge di 38 ans. On l’étère divins l'pré, å dreût dèl pwète dèl èglîse, èt cisse plèce div'nint on ête (n° 6).
Cwand Charles de Warzée d’Hermalle trèpasse, on r'vind li signeûrèye. Li maïeûr d’Indji, Charles Marie Louis de Potesta d’Engismont, l' r'atchète è 1853 èt r'ataque dès ouvrèdjes – veûr lès plans dè cadasse è 1856.
On n'a pas co dès vwètûres mins li tchåssèye Hû-Lîdje èst div'nou pus importante qu' l' Gerèye (li vî dè tins des Romins) ; adon on va intrer ôtemont divins l' tchèstê - è rodje.
Li cinse après 1856. È fuchsia : lès novèles intrêyes po l' cinse
6. L'ête divins l' pré - 7. On r'wale l'èwe – 8. Passèdje clôs
9. Agrandih'mint – 10. On novê mur – 11. On ôte novê mur
On novê mur è d'mi-rond, è brike avou pus d' 2 m de hôt, dîvisé è 2 pårtèyes qui font bouf, èst constrût foû dè costé dè sûd (10) ; on pwèrtå è bwès done l'intrèye po l' pårtèye dèl cinse.
On ôte novê mur va disqui li toûr cornière sûd-es' avou ine ouh (11).
On r'wale l'èwe dè costé nôrd (7) èt li grande toûr n' chèv pus d'intrêye po l' tchèstê mins seûlemint po l' cinse ; èt on clôt l' passèdje inte li basse-coûr èt li coûr di tchèstê (8).
Li cinse èst cwite dè l' mitan dè costé sûd qui èst rid'visé po l' sègneûr èt êsse agrandi avou on grand manéje.
Adon po fé bouf : on agrandit l' cinse dè costé dè l'es', so l' pré… mins nin so l'ète !
Li novèle façåde dè costé es' èst è stîle industriyél, avou ine passerèle aveûle qui r'sort po-d'zeûr dè l'ête.
1856 : Façåde po-d'zeûr dè l'ête. Dè face èt dè costé.
Après 1862, li pî èst masqué po ine « grote de Lourdes ».
À gôche : li pî dèl façåde masqué po l' grote de Lourdes.
Al dreûte : li minme façåde « rondjî » après 1964.
Inte 1984 èt 1990, on tape li copète al valêye – assûré po qu' li rèparåcion dè teût seûye pus bon martchî.
Assûrémint po l' minme rézon, on candje li copète d'ine tourèle divins li coûr divintrinne.
Li cinse a djouwé on grand role pindant 200 annêyes.
C'èsteût on loyin inte lès djins d'å viyèdje èt l' sègneûr ; cåzi tot l' monde (omes, feûmes, èfants d'å viyèdje) i a ovré ou djouwé, èt èle èployît ossi dès Flamins èt dès ètrindjîrs po l' såhon dès pétråtes.
C'èsteût ossi li plèce wice qu' l' curé èt lès wèzins vinît poûhî, wice qu' lès djins d'å viyèdje vinît po s' distrêre, tchak'ser ou divizer d' traze à catwaze.
C'èsteût la qu' li club po ping-pong a stu crèyé. Èt là qu' dès rèzistans s' catchît.
Après 1964, l’ouvrèdje si raptiti pus' state, ca i gn-a pus assez d' têres : li famile de Potesta a stu èsprôpriyî dès tot-plin d'hèctåres po crèyî on zoning.
Li cinse n'èst pus intrit'nowe èt s' digrogn'te.
Tchèstê èt cinse, après li mwért dè baron Édouard de Potesta, sont divins l' indivizion ; li 21 nôvimbe 1985, l’in dès pitit-pitit-èfants, Philippe de Potesta, lès ratch'te.
Mins li 23 di djun 1989, i vind li cinse tot seûle. Ine annêye pus tård, l'akéreûr li r'vind à dès djins qui fôrmèt ine copèrative po li såver.
Li rénovacion kimince è 1991, èt po lès Journées du Patrimoine è septimbe 1991, lès djins polèt viziter li grègne avou ine espôsicion d' bês-afères d' couhène. Li monde èst amaké po l' bêté dèl tchèrpinte èt l' grandeûr dèl plèce. Vola çou qui fêt l' troye danser.
È 1992, li lodjîs èst lodjåbe èt ocupé.
È 1993, l'associyåcion Li Rawète trove djîse al Cinse. L' êde a r'mète lès batimints d'adreût, a fé k'nohe lès ritchèsses di tot çou qu'èst dè bin magnî tot rapoûlant èt tot r'mètant an-état lès documints èt tot çou qui toûne åtoû d' l'amagnî, dèl toûbak', di l'istwére èt dèl couhène (por èl Bèljike èt spéciålemint èl Walonerèye).
Èle crèye ine ritche bibiliothéque, dès mûzêyes fwért intèrèssants, li taviène la wice qu'on mèt' so l' tåve dès r'cètes dè tins passé, èt des pôrminades.
È 2008, avou l'aspoyeû dèl comeune èt dès consèliers dèl province di Lîdje, èle dimande li classemint dèl cinse come « monument historique », ma èle ratind co è 2015. I falève s'ènn'atinde...
Li cinse, c'èst portant li mémwère dèl vèye d'on batimint pindant 4 siékes. Èt plin d'intèrèt po lès cis qui studièt l'årchitèktûre.
L’injèneûre Brigitte Van Hemeryck a d’ailieûr tchuzih l' cinze come sudjèt po s' TFE dè s' Master complémentaire en Conservation-Restauration du Patrimoine immobilier (Institut du Patrimoine wallon, Ama) ca i gn-a tot sôrtes di vousseûres divins l' cinse :
Tèmwègnèdje :
Il a fallu aux propriétaires et amis de ces lieux beaucoup d’audace, de courage et de persévérance pour sauver, restaurer, entretenir et embellir ce lieu chargé d’histoire, plutôt que d’en faire un parking ou un immeuble de rapport, comme trop d’autres l’on fait par ailleurs par pur profit. Qu’ils soient remerciés de leur travail et de leur amour du patrimoine.
Bruno Heureux, 9 di may 2003,
po l'espôzicion « Simenon se met à table »