Li Rawète, on acteûr citwèyin èt du påtrimwinne

Divins lès gazète come so l' web, li nom dè Mûsêye dèl Goûrmandîse èst todi avou li ci dèl « Ferme castrale » di Hermåle-dizos-Hu èt avou li ci dè « Syndicat d'initiative de Hermalle-sous-Huy La Rawète ». D'ou-vint télemint d' noms ?

I aveût ine fèye … li cinse dè tchèstê di Hermåle-dizos-Hu, qu'on lome « Ferme castrale », ine pôve cinse abann'nêye divins lès annêyes 1975. Dispôy 1991, on la ratèle mins po fé qwè ?  On a tchûzî Cultûre èt toûrisme èt nosse Soce nén recwårlante (S.N.R.) Al Rawète vint å monde li 17 djun 1993 po :

  • « Soutenir la restauration architecturale et la promotion touristique de la Ferme, et
  • Protéger le patrimoine gastronomique par la collecte, le classement, la restauration d'objets et documents originaux anciens et modernes concernant l'alimentation, le tabac, l'histoire de la cuisine et de la gastronomie (et tout particulièrement en Belgique). »

So l' prumî moumint, Al Rawète droûve ine buvète divins l' cinse.

Deûs ans après, i crèye li Mûsêye dèl Goûrmandîse.
Co deûs annèyes, èt l'asbl droûve li Bibliyothéque dèl Goûrmandîse qui a pus d' 20 000 lîves asteûre ! 

Divins lès djins ki vinèt viziter, i-gn-a co bin dès aveûles, dès djins qu'ont målåhèye di roter. Lès bonasses dèl associyåcion qui guidèt vont s' fôrmer po ine akeûy pus spéciål ; i vont minme riçûre po ça li « Prix CAP48 de l'entreprise citoyenne 2009 » !

Come lès djins ni kinohèt pus l'walon, i pinsèt qu'Al Rawète, c'èsteût -st-ine saqwè d'arape. Adon l'associyåcion va « franciser » si nom è LA Rawète.

È 2002, La Rawète kimince lès balådes avou on guide po li dihoviète dès plantes såvadjes qu'on pout magnî. 

la-rawete

È 2003, La Rawète a 10 ans !  I travaye come on syndicat d'initiative èt il èst  ric'nohou po li Commissariat Général au Tourisme come Syndicat d'initiative de Hermalle-sous-Huy (La Rawète) - n° Lg 36 ; i deût don co candjî d' nom. I crèye on novê site waibe : www.hermalle-sous-huy.be

Li S.I. droûve è 2004 li Mûsêye Postes restantes po conter l'istwère dèl Poste èt dèl scrîyèdje.

Li cinse a trové ine novèle vèye... mins n'èst nin co såvée : i-gn-a co bin d' l' ovrèdje... Li SI La Rawète diminde li classemint dès batimints è juin 2005 ; i ratind disqu'à l' 20 djanvîr 2012 po veûr drovîe li « procédure de classement » - mins ça n' vout nin dîre qui l'cinse va èsse vraimint classée å bout dè compte…

È 2012, gråce à on novê bonasse, Maxime Vincken, lès mûzèyes ont chaconk leû waibe.

On djèsse citwèyin  : prôtèdjî li påtrimwinne.

Li soce nén recwårlante a stu tchûzîe come ègzimpe di djèsse citwèyin po li Forum des associations dè 1er sèptimbe 2006 à l'Abèye dèl På-Diè (Ama).

Nosse asbl såve an-n-èfèt li påtrimwinne dès batimints (li Ferme castrale) mins  ossi li ci qui n'èst nin bati, avou lès mûsêyes.

Mins l'asbl såve ossi on påtrimwinne « immatériel » avou s' bibliyothéque.

On djèsse avou sès prôpes çans…

La Rawète pout aveûr 380 €/an [sic] dèl Fèdèråcion dè Toûrisme dèl province di Lîdje èt 1 500 €/an maximum dè Commissariat général au Tourisme po fé li rèclame dè viyèdje èt po sès prôpes djèsses… ma è 2012, l'asbl riçût po l' prumî fèye ine êde di 1000 euros dèl pårt dèl comeune d'Indji.

È avril 2011, l'asbl a don drovou divins li grègne dèl cinse on martchî d' vîs lîves avou come nom « Les Chineurs gourmands  ».

2011-05-01-panoramique-chin

D'zos d'mohone avou l' martchî

On djèsse avou dès kipagnons...

Dispôy 1995, li soce nén recwårlante a travayî avou dès-ôtes institucions culturèles come l'Agence Cyan (Berlin), li Club Le Postillon d'Ama, l'Ensemble PassionataDanse èt li Théâtre National de la Communauté française Wallonie-Bruxelles (Bruxelles), li Frietkotmuseum (Antwerpen), lès Vèyes di Lîdje èt di Hu, li CAG (Leuven), Made in Belgium (Bruxelles), li Miat (Gent), li Musée de la Vie wallonne di Lîdje, ARTE, etc.

È 2011, li Mûsêye èt li Bibliyothéque dèl Goûrmandîse ont prusté dès bès-afères èt dès lîves å Musée du Moulin et de l'Alimentation di Evere, al bibliyothéque Chiroux-Croisiers di Lîdje, å li SA Tempora po Tour & Taxi-Bruxelles, èt å musée du Grand Curtius di Lîdje. È 2012-2013, li Mûsêye Postes restantes a prusté dès bès-afères å Muséobus èt ås Flaminds d' Wervik (Flande coûtchantrece).

 

2011-expo-chiroux-detail-vi

a l' bibliyothèque Chiroux-Croisiers, 2011.

 

On djèsse sôciål...

La Rawète, come syndicat d'initiative, èst ossi mambe dè Plan de cohésion sociale d'Indjî po li loyin social èt d'inte lès jènèråcions.


Tèmwègnèdje so l'forum berdelaedje.walon.org (djulete 2007) :

Cist' après nonne, dj' a stou à Hèrmale , après Indji. Po n' nin lèyî toumer è blèsse li vîye cinse d'â tchestê, li sindicât d'inituatîve î-y-a pris djîse. Il a mètou so pîd on mûzèye, on staminè èt on vind dès lîves èl heûre.
Clapante îdèye, ènon ? Mins vola : il ont tchûzi po nom " La Rawète".
Come dji f'séve rimârquer al dame qui tint l' cayon qui c'èsteût "li" rawète qui faléve scrîre èt dîre, èle m'a rèspondou qu'èle li sèpéve bin. Qui d'avance c'èsteût " al rawète" qu'il èsteût scrît, mins come lès djins ni kinohèt pus l'walon, i pinsît qui c'èsteût -st-ine saqwè d'arape. Adon il avît "francisé" èt ç' aveût div'nou LA rawète.
Diâle mi hagne si dj'a minti !

Sins èhowe

A mi on m' aveut dit k' il avént candjî "al rawete" pask' il avént peu ki ça freut trop "arabe" come no...
D' èn ôte costé, li soce a-st ene waibe, et c' est ene des rålès waibes k' i metèt do walon dvins (et nén djusse deus troes fråzes djusse po dire, mins tot l' site); ça fwait k' i sont a mitan pardonés.
oups,... tot lijhant on deujhinme côp, i m' shonne ki "saqwè d'arape" ça sereut bén "sacwè d' arabe", li minme ki dj' a dit, dabôrd.
å prumî côp k' dj' a léjhou dj' aveut compris "sacwè k' arape"...

Pablo Saratxaga

Èt, come è l' walon "arâbe" èt "djwif" vout dîre li minme : rapiat...
Vos avoz èto l' ôte qui faît dès rèclames au posse "à tot skètter" po sès meûbes. Èst-i bin sûr d' ièsse compri pattavau ?
I faut fé avou c'qu'on a, ènndon.

Igne

Mèrci Pablo po li "dimèy-pardon" !
c'èst ine fåte, c'èst vrèye, mins ça kèstione lès djins qui n’djåsent nin walon ! I m’ dimandent çou qu’ça vout dîre , èt ça nos pèrmèt dè l’èspliquer. Après, i ont on mot walon divins leû vocabulère et… nos-èstans gangnîs !
amicålemint,

Nicole = li "dame" di Brusèle, avou on père borin èt ine mère italiyinne,
« immigrèye » divins li province di Lîdje,
qui n’ djåse nin walon... mins fèt s’possibe po l' scrîre
Nicole Hanot

Vola ène sakwè ki faît plêjhi à lîre mins, l' walon èst pus aujhi à cauzer .. k'a scrîre !

djozewal

Dja leyi "Li rantoele" .
Bin contint di veyou vos sicrihadje- Dji so an djaspineu so Toudi ki dmeure e Panama, e chal nos alons continuwer a djozer wallon asteur ki nos povons l'fe sins problemes.
Dji pinse toudi ki la politike e la literature, ci n'est nin l'minme sakwe. Pokwe dji doze Wallon, asteur ki dj'dimeure en Panama? Dji pinse ki Lucyin dit vraye: difinde sicolodjicmint di djozer li walon permete ki les walons sont pu flawes dins l'pratike des langues etrindjires...ki les otres djins so'l dagne.
A Torat !!!

guest

Come vos avez métou l'adresse émile dès djins dèl Rawète, dj' èlzî a -st-évoyî on mèssèdje. C 'èst qu' il ont l'tchance d'èsse divins ine vîye cinse èt qu' i m' sonléve qui ça pôreût èsse intérèssant dè fé veûy âs djins a qwè chèrvît tos lès batumints; Cou qu'on n' mosteure nin po l' moumint. I n-a po çoula tot plin d' anquètes qu'ont stou fêtes pa l'mûzèye dèl vèye walone. On-z-î pôreût fé veûy avou tot sôres di clapants tècstes sol l' vicârèye al cinse come 'èsteût d'avance. Vos pôrîz aspaler çoula, Pablo, la qui, m' sonle-t-i, vos-î avez vos intrèyes.

guest

Oyi, ça sereut ene clapante idêye; dins les cwate lingaedjes (fr, nl, en, wa) come sol waibe.
Mins dji n' a nén "mes intrêyes" come vos djhoz; po dire li vraiy, dji n' a måy stou.
Mins, s' i gn a moyén d' magnî låvå, on pôreut motoit s' î rapoûler on djoû.

Pablo Saratxaga

 


 

Il èst tins d'vèy c' qu'on a dèdja fêt !

Contact : +32-(0)85-31.42.86

Po scrîre : Rue Gerée 10, B-4480 Hermalle-sous-Huy

Po v'ni : Chaussée Freddy Terwagne 132a, (Ferme Castrale), B-4480 Hermalle-sous-Huy